دنیا اچھی لگتی ہے رب اچھا لگتا ہے

 

دنیا اچھی لگتی ہے رب اچھا لگتا ہے

اچھی آنکھوں والوں کو سب اچھا لگتا ہے

ساری کتابیں سارے صحیفے مجھ پر اترے ہیں

مجھ کو دنیا کا ہر مذہب اچھا لگتا ہے

جب بچوں کی باتیں سمجھ میں آنے لگتی ہیں

پھر ساری باتوں کا مطلب اچھا لگتا ہے

بچپن کی تختی پر صبحیں ہنسنے لگتی ہیں

بوڑھے لوگوں کو بھی مکتب اچھا لگتا ہے

چڑھتے اور ڈھلتے سورج کی صورت ایک سی ہے

رنگ مشرق ہو یا مغرب اچھا لگتا ہے

پانی اور ہوا کی طرح بہتا جاتا ہوں

مجھ کو اپنے جینے کا ڈھب اچھا لگتا ہے

نذیر قیصر